Salem Upa Pawlin Record thar a siam.

Mizo Upa Pawl (MUP) Salem Unit, Lunglei chuan tun hnai khan an member zawng zawng ten Life membership neiin Mizoram Record thar an siam.  MUP hruaitute hnen atanga thudawn danin MUP bika hian Mizorama Unit hrang hrangah leh khawvel huap pawhin Unit member zawng zawng Life member ni thei hi an awm hriat a la ni lo.  MUP Unit ten hetianga member zawng zawng Life members an nih theihna hi Mizorama a thlenna hmasa ber Record a ni.  Pawl hrang hrang zingah pawh ram pum huap pawl lian thamah chuan hetiang record hi a thlen hriat a la ni lo. (World Record a ni thei a ngem?)

Salem MUP Unit hian  October thla-a Intihhlimna Unit pum huapa an neih tumah Member tinte Life member ni thei tura hmalakna hi kalpui nise tiin he huna thusawitu  Salem VCP Pu Lalramliana chuan rawtin, theih tawpa VC atang pawha hmalakpui an inhuam thu a sawi a,  a rawtna ang hian MUP hruaitute pawhin hma lak chhunzawm nghalin Life membership Drive  neih a ni ta a ni.

Tunah hian Salem veng MUP Unit-ah hian member 92 awmin,  hun hmasa lamah Patron member 2 leh Life member 10 an nisa tawh a; tun tuma hmalakna (Total Life membership Drive)-ah hian a bak member dang zawng mi 80 te hian  Life membership fee pe tharin member zawng zawng Life Member an ni ta a ni.  Salem MUP hruaitute chuan  hetiang dinhmun chang thei tura anmahni finchhuahtu leh a tul anga tanpuitu VC memberte chungah an lawm tak zet tih an sawi bawk.