Salem veng pa, State Award for Meritorious & Outstanding Teacher dawngtu Pu C.Saihmingliana Headmaster Gov't. PK M/S Lunglei, chuan 17th Aug.2011 khan Lunglei Salem venga a chenna In lo thlengin veng mipuiin an theih ang tawka ropuiin an lo hmuak.
Pu Saia hi tlai dar 3:30 velah lo thlengin, a tirah chuan chawhnu dar 2:00 vela lo thleng tura beisei a nih avangin chawhnu lam atrangin veng chhunga mipui remchang ang angte chu an inah hian an lo pungkhawm tawh a ni. Education Department-a hotu DEO Pu ST.Zaduna leh Lunglei South Bialtu SDEO Pu Vanlalchhana te pawhin VC te ngenna angin he hun hi min lo hmanpui a a lawmawmin min tiphuisui lehzual.
Pu Saia hian an chenna inchhung a luh hmain an In kawtah amah lawmna hun tawite hman a ni a, he hunah hian VC vice President Pu K.Lalthlengkiman kaihruaiin VCP leh NGO hrang hrang - YMA.MHIP,MUP aiawh ten thu an sawi bakah Department hotu DEO leh Salem veng atranga National Award for Teacher dawngtu Pu PC.Lianbuanga te pawhin thu a sawi bawk.
He huna thusawitu VCP Pu.Lalramliana chuan "Hetiang hun ropui hi kan VC term chhung hian kan tawng ve thei ang em? tia kan nghahhlelh em em a ni a, Zaithiam Idol thlante leh Infiam mi, engemawchen inbuatsaih a lawmman dawngte mah chawimawi an nih chuan... thil harsa tak, mahni eizawnna kawnga thawh thrat avanga Sorkar chawimawina dawng thei Pu Saia hi khawtlangin lo lawma, chawimawi hi a phu hliah hliah a ni" a ti. A sawi zelna-ah "Pu Saia te chhungkua chu Mizoram huap Award dawng thei pathum(3) ngawt - Amah, a fanu Bethsy leh a nupui Pi Parteii te an awm avangin hetiang ang awmna chhungkua leh khawtlang hi Mizoram chhungah hian veng dangah an awm pawhin a lang lova; chuvangin Salem veng hi kan inchhuang hle a ni" tiin VCP chuan a sawi bawk. He a hlawhtlinna hi a inpekna leh taimahna mai bakah a eizawnna leh hnathawh chu Pathian rawngbawlna-ah a ngaih tlat avanga chawimawina dawng a ni tih sawi langin, Veng chhung mi dangte leh thrang thar zelte pawhin hei hi chona-ah ngaiin hei aia chawimawina ropui zawk dawng thei tura tran la thar zel turin a fuih bawk.
Award dawngtu Pu Saia pawhin thusawiin, Zirtirtu hna chu hna dang ai pawha a thlan zawk a nih thu a sawi a. Amaherawhchu, mi ten zirtirtu a nihna aia Musician a nihna chu an hre zawk mah thrin tih sawiin, chu chuan a rilruah hrehawm tih rukna a nei fo thrin. Tunah erawh Zirtirtu thra chawimawina a han dawn takah hian, amah chuan Zirtirtu thra nihna dinhmun chu phu lo inti hle mahse, Zoramin Zirtirtu a nihna an hriatsak ve ta chu a lawm tak zet tih a sawi bawk.
Pu Saia hmuahna-ah hian veng chhunga school awm. Salem M/S leh D&D English school naupangte chu kawng sirah lo intlarin amah an lo lawm a, VC te sawmna angin an zirtirtute bakah P/S zirtirtute pawh kim takin an lo tel thei a ni. Thingpui ruai nen ropui taka lawmna hun hmangin, veng chhunga VC, NGOs leh Mimal engemawzatin pangpar lo hlanin, khawtlang aiawha chawimawina thuziak chu VC member Pu HS.Lalhminglianan a hlan bawk.
Salem veng hi kan nep lova, Chapo si lovin, veng lian zawkte aia kawng tam takah hmahruaitu kan nih ve thrinna hian khawtlang hruaitute a tilawm tak zet a ni.
No comments:
Post a Comment