FAI ZUAL THLA hman tan a ni ta.

‘Mizoram hi India rama bawlhhlawh paih man chawi lohna state  pahnih awm chhun zinga pakhat a ni.’ – RL.Zidinga, DUDO, UD&PA Deptt.

Pu RL.Zidinga, District Urban Development Officer , UD&PA  Deptt. Chuan  vawiin 27.8.2011 (Inrinni)  khan Khuallian niin  Salem vengah FAI ZUAL THLA  hi a  hawng.

            Salem veng Co-ordination Committee huaihawt a kumin September thla hi veng chhungah Fai Zual Thla atan puan a nih angin, vawiin khan a hawnna programme hi huaihawt a ni a, Salem veng mipui 300 chuang kalkhawmin Faina chungchang pawimawhnate inzirtir a ni.  

   

He huna khuallian Pu RL.Zidinga chuan thu sawiin, Mizoram Sorkar chuan Faina kawngah UD&PA hmangin hmalakna kalpui mek a ni tih sawiin, ‘Mizoram hi India ramahmipui ten  a man chawi lova bawlhhlawh paih thin state  pahnih awm chhun zinga pakhat a ni’ a ti a. Faina chungchangah  Lunglei khawpui chhunga bawlhhlawh paih hna chu UD&PA deptt. Chuan  theihtawpa hma a la chung pawhin Motor leh thawktute indaihlohna avangin duh anga  hmalak a har thu a sawi a. Tun dinhmunah chawlhkar tin Truck trip 40 vel bawlhhlawh pawih tur awmah trip 20 vel chauh an paih thei rih a ni tih sawiin, thawktute indaih lohna avang hian sweeper-te pawhin tuk khatah meter 300 velbak an phiat fai hman rin meuh lo tih a sawi. Salem veng chu an department hmalakna thawhpui tha bertu veng zing a mi a ni tih sawiin, veng chhunga VC ten bawlhhlawh paih motor a khat tawka an lo ruai ve thin chu lawmawm a tih thu a sawi bawk. Khuallian hian mipuite chu faina pawimawhzia hriaa theihtawpa an department hmalakna thlawp zel turin  a ngen bawk a ni.

He Fai Zual Thla hawnna-ah hian Salem VCP Pu Lalramliana pawhin thu sawiin Faina leh thianghlimna chu Pathian dawtah ngaihpawimawh hmasak ber tur  a ni a ti a, Mimal leh chhungkua atanga tan a nih loh chuan khawtlang hruaitu leh Sorkar hmalakna atang ringawt chuan  Faina kawnga hmalakna-ah hian a hlawhtlinna hmuh a harsa a ni a ti. Co-ordination Committee-in Fai Zual thla a puanna chhan chu September thla chauhva Faina kawnga hmalak tumna ni lovin, mipui chawh tho tura bul tanna a ni a, he fai zual thla atang hian  rilru thar nen Fai Zual  zel tura hmalak tum a ni a ti bawk.  He hunah hian MUP President Pu PL.Lianzuala leh Pu Zairemkunga (Snr. Adviser YMA & MHIP) te pawhin thu an sawi bawk. Fai Zual Thla hawnna-ah hian Khuallian hi Pu.Zahminga, Sanitation Inspector - UD&PA chuan a rawn tawiawm bawk a ni.

            Salem veng hian Veng chhunga hmalakna kawng hrang hrangah phawkhai rual zawka thawhho a nih theih nan Co-ordination Committee dinin NGOs hrang hrang President leh Secretary te bakah an Advisers leh VC member zawng zawngte chu he Committee-ah hian an tel a ni.