Salem veng-ah Anganwadi Centre pahnih kan neina chu a rei tawh a, Centre-II zawk hi a hmunhma kan neih loh avangin building nei lova VC house hnuaiah rei fe an kal hnuin tunah chuan Lunglei District-a Anganwadi Building mawi ber leh tha ber tur kan sa zo ve leh ta e.
He Building sak nan hian Department atangin Rs.1,60,000/- hmuh a ni a, mahse hei hian a sakna a daih lo hle. VC te chuan khawtlang sum atangin Rs.45,000/- vel belin, Cheng 2,00,000/- chuang senga sak zawh a ni. A hmun tur pawh hi vantlang hmun ruak a awm loh avangin VC te chuan khawtlang sum atangin Rs.25,000/- sengin mimal in-hmun Pangkai tuikhur bul (Nursing School bulah) a lei a, he hmunah hian sak a ni ta a ni. Anganwadi Centre-II atan hian a hmun leina leh a sakna tura sum belhchhahte nen VC chuan Rs.70,000/- vel a sen belh a ni. Department hotute pawhin he building mawi tak hi a hmunah rawn enin, an beisei phak bak a nih thu leh tha an tih thu hahiip-in an sawi ve a; a lawmawm tak zet a ni.
Anganwadi centre-II Building hi Ft.24 x Ft.15 a zauva sak niin, a chhungah Toilet tha tak leh tui dehna bakah chhuar te pawh siam a ni bawk. He Centre-ah hian Worker Pi Partei w/o Robert Lalfakzuala niin, Helper-ah Pi Lalmalsawmi w/o Pu C.Lalthanzuala te an thawk mek a ni. Kum hmasa lamah Anganwadi Centre-II sakna hmun tur kan neih loh avanga hmun danga sawn chhuah mai an lo tum fo tawh hnuin, tunah chuan ngaih a ngam ta e. Centre-III tur pawh VC ten neih belh leh dan an ngaihtuah zui mek a ni.
No comments:
Post a Comment